[André]

>> Lou Vésubian <<

[propi ieu]

estou moument lu agent noun fa ren que de ficanas lu papier dei nissart, aloura quoura arriba amid me la sieu bycicleta en placa galibardi finda eu se fa verifica-moussu lu papier -amid estouna?me lou sieu testa de pista carta respouode msieu ji pas-et lou casque en aves mancou pa-non msieu l'agent -et cenque pouortes darriera dintre la sacocha-di pommes di terre et deux mulon- noun pouodi laissa passa aco a trei subre na bycicleta va vi cousta car.

[SIOU D AQUI]

Coumat si ditz un chapacan...

[Caga blea]

[manja ceba]

Vequì un'istoria vertadiera qu'es aribada au mieu paigran,pensi en circa dei anada 30,doù coustà d'en Sirìa o doù Liban!
Eu èra dins l'armada dins lou genì.Li èra un legiounari mé una barbassa que ti dìi qu'acò e que si dìia Oungres!Aquel estre parlava gaire.Cadun saup que la maja part dei legiounari an un passat fousc,e souventi fes minga passat!
Un beu jou de sourdà demandon au mieu gran:"
" toi qui es de Villefranche dit nous un peu comment se nomme ce poisson?"
Ben que siguesse" Vilafranquié moun gran èra pas un especilista de la pesca,e li respounde qu'es 'na buga.
darrié d'eu aude una vous grava que li di souta vous en Nissart:"maqué buga es un suc!".èra lou "oungres" que li avìa respoundut!
"t'espliguerai li fa encà!
Lou tipe èra un Nissart de la coca,una gouapa de l'assouciacioun de maufatan Nissart,l'as de pica,aloura ben counouissuda,e que fugìa la justicia Francesa en s'escoundant dins la legioun!
Cauqu anada pu tardi si soun crousat à Nissa sensa ren si dire !

Vi counvidi d'escoutà la cansoun de Sauvaigo"la balada de felis galean e de Noré Ciais"o de la liegì dins"l'antoulougìa de la cansoun doù countat de Nissa"pàgina32,doun es fach alisioun à l'as de pica.

[manja ceba]

Li a finda un'istoria se Francis Gag coum 'acò,que vi cunterai ben leu!

[manja ceba]

Arribi pas à metre la man soubre lou testou!Cresi qu'es dins la veitura!Cau qu'asperi la frema que si recampa 'stou serra!

[manja ceba]

[manja ceba]

Vequì dounca l'istoria tant asperada de Francis Gag!(aremarci lou mièu amic Jan-Miquéu d'avé mes per escrich lou raconte dòu mestre)

Lou mitralhur taurmente crestian.


Quoura li nebla s'amoulounon,quoura audi petà lou tron e que véu l'aiga degoulà de li taulissa à plen bournèu,pensi à Tita.Tita que avìa fach touta la guerra de quatorze e que avìa toujou quauquaren de nòu à vous cuntà.A cenque mi diguet un jou,lou plus marrit à passà fouguet per éu lou premié ivern aquéu dòu 1915.Ma un ivern,un ivern maladit que avìa estirassat emb'éu ,vent,pluèia,chavana,raissa,tempié,e èron enfangat en la pauta fin ai ginoui,que diéu fin ai ginoui!Fin à l'ambourigou,embé lu Alemand en faça à vuetanta metre se vous fa ren,entanat couma elu que au mendre signau de vida desclanchavon de tir de barage.E Tita èra aquì que venìa enrabiat.sabès lou barjabau lou si rouiava.E vequì qu'un bèu matin,ramaissa,pareisson lu premié rai dòu soulèu,lou soulèu d'Abrièu...vous di?Oh...

Plan planin embé mile precaucion Tita s'asarda à tira un còu d'ues au dessoubre de la tranchea...Craaaac!Una rafala de mitralhusa venguda de l'autre bòrdou lou fa intrà dins la siéu grueia,e durant vuèch jou es ensin.Sus l'estenduda que separa lu nemic la terra s'endaura,l'erba regréia,,mounta dòu temp que lou baudou d'en faça éu tira,tira,tira...
Aloura à la fin li tenant plus,Tita groupa un mandiéu blanc à la pouncha dòu siéu fusiéu e si issant sus l'orle de la tranchea si laissa anà à cridà,à bramà,tout cenque a sus lou pièch,en Nissart ben segur,e un Nissart cranat,coulourit cresès-mi,mai que noun lou pourìi dire:"bougre d'amassa-can"diìa Tita au mitralhur,"ma l'as pas encà finida noun?Tu mé lou tiéu moulin!Lou souléu luse per toui noun?per tu couma per nautre,es-pe-ça-de-mou-re-touòrt!"E tenés-vous ben de l'autre caire li ven aquesta respouòsta en Nissart parié :"Taise -ti baveca!"

De l'escoumbùi Tita regouòla au fount de la tranchea e sensa repilhà l'alens'en va trouvà lou coumandant de la coumpanìa:"Coumandant demandi à chanjà de setour,li a en faça de nautre de gent que parlon lou Nissart e iéu...acò...mi mete lou trouble sabès.Siéu...siéu plus bouòn à ren vé!Chanjas-mi!" "ma soun d'alemand lou sabes couma iéu, noun?" "Si pòu ma parlon lou Nissart!E iéu pouòdi pas tira sus de quauqun que parla Nissart,meme s'es d'Alemand,m'avès capit?" "bouòn...e ben vai,aspera deman pourai ti dire quauquaren."

Lou lendeman à l'auba lu Frances ataquèron e lou premié Alemand à aussà lu bras siguet qu?E ben siguet lou famous mitralhur tourmenta-cristian.Saupèron lou fin mot de .Lou coulèga avìa travalhat doui an couma"major d'homme sur la jetée promenade"e lu quauqu mot de Nissart que avìa retengut li avìon siervit à faire respouòsta à Tita, e dau còu n'avìon plus lou couòr à si batre.
La guerra finida lu doui ome si reveguèron e cada còu que si rescountràvon:"Ou!moure touòrt sies aquì!"diìa Tita,"Ahì" respoundìa lou mitralhur"e couma ti va baveca?"E vague de rire.

Per tant baveca e moure touòrt que sìgon lu ome de toui pais,de touta raça,pourìon bessai s'entendre.Se li prestesson un tant si pau,hum...Auguran que li arìbon un jou...ma sensa tròu li crèire!

Franci Gag
(de fiéu en courdura)

[manja ceba]

"pura lou souléu luse per toui,noun?"

[Caga blea]

magnifique

[manja ceba]

6 - DOUI BRANDA

Un gran matin d'ivèr, doui brave muradou, lou sac de gip sus lou couòl, la tibla, la martelina, lou frutassou e la gamata souta lu bras, s'en anavon alègre au chantié. Era encara escur, pas una ànima en li carrièra, e fahia un ziéu de can que intrava en la couòta. Lu paure diau, sènsa pardessus, tremoulavon couma la fuèia.

Lou travai èra encara luèn e lu cambarada aurion bèn vourgut si rescaufà un pau.Va-ti-fà foutre, touti li buvèta (1) en aquela oura, èron serradi. Pihon lou siéu mau en pacienssa, e si mèton en camin en faguènt de taquèta quoura vèhon un oste alumat. Lou mèstre s'èra levat plus vitou pèr faire lou zinc e lu cuivre (2) dóu comptoir (3).

"Doui branda ! ", demandon lu amic.

L'aubergista encara embarlugat e estounat de vèire de cliènt tant matinié, au luèc de pihà la boutiha de l'aigardènt, piha aquela dóu "poli-cuivre" e n'en remplisse lu gòtou.Lu coumpagnoun bèvon, fan cantà la lènga de plesi, pagon e s'en van.

Mà, un moumént après, l'oste, mihou dervihat, s'enavisa de l'errour, vèn blèime, s'arranca lu bèrrou :

"Sien perdut, si pènsa, ai empouisounat aquelu baudou !".

Laissa venìlou jour, s'abiha propramen, e s'en va cuntà l'afaire au coumissàri dóu quartié, fa li siéu escusa, parla de pagà lu frès, courre à l'espitau vèire se an pourtat li vitima. Rèn !

Lou lendeman, à l'auba, vé intrà lu doui coumpaire. Lou "bistro" noun sabia doun si mètre.

Avia una brava petoucha e noun sabia couma faire.

"Doui branda ! ", demandon d'un ton countènt.

Lou mestre pèr lu dedoumajà de la vèia, piha una boutiha cuberta de poussièra d'un vièi Armagnac que destapa religiouhamen e n'en remplisse doui gòtou.

Lu amic bèvon, si regarjon, fan la mina, pagon e en sourtènt dihon :

"Soun toui parié, la premièra fes vous siervon bèn, après vous dounon que de salouparia !".

Louis PIN
(1875-1957)
Armanac Nissart, année 1939

(1) On dit plutôt : "beguda"
(2) On dit plutôt : "aram"
(3) On dit plutôt : "la banca"

[SIOU D AQUI]

as pa tou capit lou siou ma buouna parte

[manja ceba]

Liege lou 2 o3 còu da ret,e pensi que capisseras(es pas tròu dificil)!Senon lou mi diras e lou ti revirerai en frances d'aquì cauqu temp(per pas levà lou sabour dòu testou per lou moument).

[Caga blea]

Un "Grand Classique du Rire" niçard aquèu texto
Mercès MC.

Dedicaça especiala per SIOU

[Maxita]

Manja ceba, Fidelità, enregistrez tout ça dans un fichier wav, SVP!

Ciao,
Max

[manja ceba]

ieu sieu pas equipat per lou moument ...ma li pensi !Bessai que fidelità...o mestre Caga,bessai

[Caga blea]

Allez vai, ren que lo principi -> aquí

[Maxita]

Grassie, es propi interessant !
Continue!
Max

[manja ceba]

Bravo Caga marconi(la, vous dòu siéu mestre ).Sabìi ben que poudiavan countà sus de tu!
Aloura coum'acò as de counouissença en informàticou?

[André]

..............................Lou pignatoun....................................

Preparacioun :

Per una persouna enmascada, pihà :

· Lou pichin crouchifis de bronzou de maioun
· Una pichina stàtua de la Madona
· Doui ciri de la candelièra
· Un couòr de vedèu tuat la vèia
· Una sartàia
· Cinq o sièi desanau d’ esplingueta
· un pignatoun nòu

Alestimen :

Cau avé d’ ajuda per alesti aquesta receta, au mancou una persouna !
- A ounze oura e mieja de séra, barà la pouòrta de maioun.
- Assendre quauqui estela plaçadi en crous dessouta lou trepèn de la cheminèia.
- A coustà dóu fuèc, metre lou crouchifis , la pichina stàtua e li doui ciri assendut.
- Embé la man senèca, pihà la sartàia e faire li signau cabalisticou.
- L’ ajuda – couhinié déu, embé la sieu man senèca, ficà li esplingueta dintre lou couòr de vedèu en recitant li paraula màgiqui.
- Coura la masca, tourmentada, ven à picà à la pouòrta e suplicà, l’ ànima enfadada es aloura escounjurada ( souventi-fès, la masca leva lou malefici sensà veni)
- Ficà lou couòr de vedèu embé li esplinguata dintre lou pignatoun
- Souterrà lou pignatoun au fount dóu jardin.

(Se noum avès de couòr de vedèu, poudès faire buhi d’ aiga dintre lou pignatoun e gità, una au còu, treze agùlha en recitant li paraula màgiqui).

N.B. : Propi destartalevat, aviavan pas noutat lu signau cabalisticou e li paraula màgiqui. Lu nouòstre letour seran brave de nen descourpà.


......................................................... de Séraphin Laugeri
_________________
Le souvenir est le parfum de l'âme
(George Sand)

[manja ceba]

Heu,en aquèu moument,lou Gim serìa pas un pau emmascat!Après lou Pairòu de Sant esteve,vequì lou pignatoun màgicou dòu Rai!

[André]

acò bessai es una soulucioun pèr faire escapà la masca

[André]

Conte dóu Paraire

Quoura siés dins la valau de la Vésubìa, qu’avès passat lou Cros e qu’arribés davant San Jouan, poudès pihià, à man drècha, una routa puha devèrs Duranus e s’en va à Nissa en passant pèr Levens.
Avès pas besoun d’anà tant luèn ! A un o doui kiloumètre de San Jouan, trouverès un pouònt. D’aquéu pouònt, un marrit camin, escoundut dintre de baragna, vous mena fin à una louòna d’aiga trasparènta couma de vèire e à un valoun que li dìhon Lou Paraire. Poudès crèire aloura que siés entrat dins un luèc plèn d’encant, couma n’i a pas doui parié !
De matì, lou valoun resta un pau à l’escur perqué es envirounat da doui mountagna : « lu Grifou », doun li èra d’un tèmp de la cultura, e una autra mountagna, bèn pu auta, doun si vè en cima una crous. Li gènt d’aquì penson que de cous o de masca poudìon sautà d’un caire à l’autre, acò dèu pas èstre vèr, mà vai ti saupre !
L’aiga de la louòna es una aiga bèn frèia que cala en pluèia d’una bàrra que dèu avé au màncou quaranta metre de aut. Pèr si jugà, a vourgut faire aquì una bella cascada, e couma s’en cala tout drech, li an més lou noum de cascada dóu Rai.
En amoun, e tambèn davau, li a d’autri louòna. Lou pichin raiet d’aiga sauta de l’una à l’autre e s’en va plan planin, sènsa faire d’istòria à la Vésubìa. Cèn que devés faire es de segre lou valoun e de vous fermà souvèn à una louòna, o encàra sus una « lauva », quoura lou soulèu l’a bèn escaufau. Poudès tambèn vous bagnoulà. Souta dau pouònt, l’aiga es clara e bella couma damount à la cascada, mà es pas tant frèia. Li planta que crèisson dins la louòna li dounon un coulour vert, e quoura li a pas de planta, l’aiga es blu couma lou ciel, mè un pau de blanc. Sus lu baus que s’arregouòlon de la riba, vèirés souvèn coum’una taca nègra. Mi sièu sèmpre pensat qu’acò èra un « tron », perqué lou m’avìon dich. Encuèi, sàbi bèn cèn qu’es, mà lou vous dièu pas, mi sembla pu bèu de crèire que es realamen un « tron ».Quoura es pas sus una roca mà dins l’aiga, aloura la taca pau èstre rouja.
Doun vous siés assetat, sènton bouòn la farigoula e la lavanda. Siès aquì soulet, degun pér faire de bousin. Audés rèn d’autre que l’aiga que esquiha sus li lauva e que canta la siéu pichina cansoun pèr vous convidà dà bèure e ….. li cigala pèr vous tenì coumpanìa tout lou jour e tout l’estièu.

Y. Gilli
_________________
Le souvenir est le parfum de l'âme
(George Sand)

[manu#66]

per revenì sus dóu sujet vequì un pichina galejada:
es un ome que souòrte de presoun après avé passat cinq anada soulet, sensa frema.
s'en parte aloura veire una filha dei carrièra, una filha aisada couma si di.
li demanda lou près.
"- 50 euro per lou faire sus d'una cadièra; 100 euro per lou faire dins la couhina e 500 euro per lou faire dintre lou liech tout'una nuèch
- ai chausit: 500 euro!!
- vouòs un còu dins lou liech?
- noun!!!! 10 còu sus la cadièra! petan!!!""

_________________
Qu tèn la lenga tèn la clau

[manja ceba]

Sus la mema draia:

Es Choua que rescontra lou siéu amic Pepin.Aloura lou miéu viei amic despì lou tiéu matrimoni que si sien pu vist,que mi cuentes de béu?
_Noun m'en parlà.
-couma? si sien ben amusat coum'au bouòn viei temp,né?
-Ahì couma au bèu viei temp,li respouònde Pepin en souspirant.
-Sinqu'aven pas fach coura eravan jouve,de manjuca,de beguda,li filha..e meme li petan,né?
_Ahì finda li petan.
_E aloura que t'arriba de faire lou mourre aloura qu'as espousat la pu bella ,la pu douça,la pu atenciounouha dei fremeneta?

_ahì la pu atenciounouha.

-zou,Pepin ,di au tiéu viei Choua sinque ti soucit.
-Ti remembres de la noça?
-Se m'en remembri?Que festa!
-Ahì que festa!Aven manjat e balat couma au béu viei temp!
-dòu temp que balaves mé la tiéu jouva espousa,t'escoundi pas que mi siéu calignat doui o très pichouni que ti dìi qu'acò,couma au bèu viei temp!
-Vouei Choua ,e aven begut mai que de rasoun,couma au bèu viei temp!

-é,é,é,aven chimpat couma de trauc,èri propi salat!Ma finda tu coura sies partit ai bras de la tièu Nanoun per la vouòstra nuech de noça,m'as semblat un pauc chouc ,lou miéu viei pouòrc,né?

-Ahì e es aquì lou proublema.
-couma ?as pas pouscut...


-noun,noun per acò tout s'es ben debanat ,aven bouat couma de fouòl.
-noun mi dire que...
-noun, eravan ben tout ai doui.
-aloura capissi pas.
- e ben figure ti ,qu'au moument de m'endurmì,miech salat,ai pauvat un bilhet de 100 Euro sus la taula de nuech de la miéu moulhé...couma au béu viei temp dei petan!

_O la,la que coufa!paura pichouna,m'imagini la testa qu'a fach la mesquina en si dervilhant,o,la,la!!!

-ma qué,es la mieu testa que cauìa veire!
-couma la tiéu testa?Capissi de pu pauc en pu pauc!
-Ahì la mieu testa coura ai viste que m'avìa rendut la mouneda!!!!

[SIOU D AQUI]

bien connue en français mais tellement mieux racontée....

[Maxita]

Bravo, ben escrich.
Maxita

[manja ceba]

mercì...meme se l'istoria es pas miéua!

[manja ceba]

lou det de Carlo Peyrat,

Aven toui vist 'o au mancou audit dire sus lou gest brut dòu nouòstre consou!!A levat lou siéu det dòu mitan devers lou ciel,acò denant li camerà de televisioun.Pareisse que coura aquéu det es levat meme ben aut,à ren da veire m'au ciel,ma vourìa dire de lou si ficà en cauca partida dòu cor mai proch d'en terra que dòu ciel!!!
Vourìi estre just devers lou nouòstre mera,cau saupre qu'à Nissa levar lou det (tamben que lou coué)es'na vielha tradicioun!
counouissen toui l'estàtua dòu rei Carlo Felice que trona sus lou pouòrt,e que la reprouducion es sus la placetta de la coumuna(à fouòrça de la veire mestre Giaume s'en es bessai inspirat!)
Aven toui aremarcat que li manca un det(lou guignare).
L'istoria vau que apres d'avé d'un temp incensat lo sieu rei au pounch de lui drissà la famouha estàtua lou pichin poble Nissart à la fin dòu regnou Felicenc ,furious que lou pouòrt de Nissa non sigue pu franc au proufit d'aquèu de Gènova, li aurìa mandat de codou fin à li roumpre lou sieu det!Acò si retrova toujou dins la tradicioun carnavalesca de la nouòstra cieutà,apres davé festejat dapé d'un rei de carta pista, la coustuma vau que si deu estre cremat!Tradicioun coura nen tènes!Dins un armanac Niçart viei si di que soun de fourmiga que li gratavon lou cuòu e quen vourgan lu levà m'au det lou sieu guignare de peire si serìa rout dins lou sieu trauc dòu c...!Una autre raconte di que lu pescadou dìion que lou bouòn rei li mounstrava doun cauìa pescà.
Ma cadun sau finda que de mounsrà dòu det es pas poulit,e mi pensi que soun de bouòni maire de familha qu'augueron emputat lou famous det per parà la bouòna educacioun dei sieu pichoui!
Toujou es que prepauvi de durbi una souscricioun per drissà una estàtua dòu nouòstre senatour mera per coumemourà lou sieu gest ìstouricou fedel à la tradicioun Nissarda,...m'un pichin passeroun qu'escounderìa lou sieu det ben segur!!!